السلام عليكم ورحمة الله وبركاته 
قررت تشترى شاشة او مهتم بمجال الشاشات وعايز تعرف ايه الجديد ؟
يبقى اتأكد انك عامل بوك مارك للمقال ده عندك لأن شاشة فيبلس 24M1N3200Z اختيار ممتاز فى الفئة السعرية المتوسطة 200 دولار تقريبا  فى وقت كتابة المقال .

تجربتى مع سلسلة Momentum  تجربة مبشرة الحقيقة وهتعرف ليه بعد شوية.
المعتاد فى التعامل مع شركة فيلبس عموما هو دقة الارقام فى المواصفات لكن فى بعض الاحيان كنت بستغرب لما بلاقى الشاشة مطلعة نتائج افضل من الارقام اللى متقدمة من فيلبس نفسها .

ايه اللى بيميز شاشة PHILIPS 24M1N3200Z ؟

قول ايه اللى مش بيميزها , المواصفات الاساسية بس تقدر تخليها من افضل 3 اختيارتك فمثلا الشاشة بتيجى:

1- بمقاس 24 بوصة او بالظبط بالظبط 23.8 بوصة (مش بقولك دقة الارقام؟ ) وبدقة Full HD يعنى Aspect Ratio 16:9 - Resolution 1080x1920

2- البانل المستخدمة فى الشاشة دى IPS يعنى الوان زاهية وطبيعية وزاوية رؤية ممتاز 178 درجة وده بيكون الاختيار الافضل لمصممين الجرافيك لكن سرعة الاستجابة هنا كمان ممتازة لو هتجيبها للالعاب

3- سرعة الاستجابة 1ms MPRT ؛ Motion Picture Response Time ولو مش فاهم ايه الكلام ده فده يعنى سرعة استجابة الصورة المتحركة او ببساطة ايه مدى وضوح الصور المتحركة فى الميللى ثانية والرقم كل ما كان اصغر كل ما كان افضل .
سرعة الاستجابة بمتوسط 4ms GTG ـ (Gray to Gray) وفى بعض الاحيان الرقم كان بيوصل 3 ميللى ثانية ولو مهتم تفهم سرعة الاستجابة بشكل اعمق فهتكلم عنه بشكل مفصل فى مقال تانى .

4- معدل التحديث او ال Refresh Rate
165هرتز وبأكد عليك ان الشاشة هتأدى معاك سواء كان استخدامك للالعاب او كمصمم جرافيك

ايه هى محتويات بوكس الشاشة؟
1- Power cable PC
2-External Power Adapter 
3-HDMI cable 
4-Monitor User Guide (Manual)

الشاشة بتيجى بالمحتويات الاساسية لذلك اتأكد لو هتشتغل عن طريق كابل Display فأنت محتاج تشترى كابل لأنه مش موجود فى العلبة 

تركيب القاعدة سهل جدا ومش محتاج اى خبرة فنية أو أدوات 

القاعدة معدنية شكلها شيك وعلى فكرة متينة وباين جودة الخامات فى التصنيع

قاعدة الشاشة من نقط التميز فى Philips 24m1n3200z والسبب انها هيدرولك وتقدر تحركها فى كل الاتجاهات وده هيساعدك لو بتشتغل على الكمبيوتر لفترات طويلة فتقدر تعدل من وضع الشاشة من وقت للتانى 
-5° ~ 20° (Tilt)
130mm (Hight)
Pivot Mode 90

وتقدر تثبت الشاشة فى وضع رأسى فى حالة لو عندك اكتر من شاشة او عايز تستخدم الVertical Scrolling من غير متحتاج انك تشترى Vesa Mount

الشاشة بتيجى بمداخل:
2x HDMI Port 2.0
1xDisplay Port 1.4
3.5m Audio Jack 
الشاشة للأسف مفهاش سماعة داخلية لكن تقدر توصل عليها سماعة او هيدفون خارجى 

كل اللى فات كمواصفات اساسية للشاشة كفيل يخليها من اهم اختياراتك لكن نقط التميز الفعلية 

1- السطوع: شركة فيلبس بتقول سطوع الشاشة ٢٥٠شمعة فى المتر المربع او زى مبنقول كدة ٢٥٠ نتس nits ودى بالمناسبة الوحدة الدولية لقياس شدة الانارة المهم ان التجربة الفعلية بينت ان اضاءة الشاشة عدت ٣٣٠ نتس وده افضل من معظم الشاشات فى نفس الفئة السعرية

تعالى نتكلم شوية عن التقنيات الموجودة فى شاشة PHILIPS 24M1N3200Z

1- FreeSync & G-Sync: متوفرين وشغالين بدون مشاكل حتى من غير الدعم الرسمى لل G-Sync
2-MPRT : ودى تقنية مشابهة لتقنية ELMB (Extreme Low Motion Blur) ودى فايدتها تقلل البكسلة او البلور فى الصورة المتحركة لكن هتلاحظ ان إضاءة الشاشة قلت بشكل كبير فأنصحك تستخدمها لما تكون بتلعب العاب بإضاءة فاتحة 

3- Low input lag : تقنية بتقلل من الزمن اللازم لنقل حركة معينة للشاشة وده هيفرق خصوصاً مع اللاعبين المحترفين خصوصا فى MOBA &Shooting Games

Smart Contrast : تقنية خاصة بفيلبس وهدفها التحكم الديناميكى فى اضاءة الشاشة والالوان خصوصا الالوان الغامقة بحيث تناسب المعروض 

الألوان : 

sRGB : 99.9%

الشاشة بتدعم 16.7 مليون لون وخلينى اقولك ان الرقم ده مش عشوائى وان وراه قصة صغيرة كدة خلينى احكيهالك 
كل الالوان الرقمية تقدر تطلع على الشاشة بالدمج مابين درجات 3 الوان هما الأحمر والأخضر والأزرق Red-Green-Blue واختصارا لمنظومة الالوان دى احنا بنسميها RGB وعلشان تقدر تدمج مابينهم فتم تقسيم درجات كل لون الى 256 لون فكدة عندنا 256 من درجات الاحمر من الفاتح للغامق وزيهم للأزرق والأخضرفلو حسبت 256 أس 3 يعنى ضرب 256 فى نفسه 3 مرات هيطلع لك الناتج تقريبا 16.7مليون لون وبكدة تكون الشاشة مغطية بالفعل  99.9% من ال srgb أو Standard RGB 

ولذلك فلو شغلك مصمم جرافيك لسوشيال ميديا مثلا أو مصور فوتوجرافى والصور هتتعرض بشكل رقمى فرقم نطاق ال sRGB يهمك والوان الشاشة فعلا هتفرق معاك فى دقة شغلك 

Adobe RGB 90.4%

اما بقى لو شغال فى مجال الطباعة ولأن اكبر مشاكلك اختلاف درجات الالوان بين الصورة على الشاشة عن المطبوع ففيه نطاق  تانى من الالوان  وهو Adobe RGB لكن مشكلته ان الشاشات اللى بتدعم الوان نطاق Adobe rgb برقم عالى سعرها بيكون عالى حبتين
ولذلك رقم 90.4% كدعم لل Adobe RGB هو ممتاز فى المجمل وممتاز جدا كقيمة مقابل سعر
المهم انك متنساش تغير اعدادات الLightroom  علشان تقدر تستغل الميزة دى 

DCI-P3 94.1% : 
Digital Cinema Initiative - Protocol 3 وده نطاق الوان لمتخصصين التصوير والعرض السينمائى